FSHF lajmëron përmes faqes së tyre zyrtare se do të ketë një organizim special për mbylljen e karrierës si futbollist të ish-kapitenit Lorik Cana. Kjo datë përkon me ndeshjen e fundit që do të zhvillojë kombëtarja jonë përballë Italisë në kuadër të botërorit “Rusi 2018”.
Eventi special do të zhvillohet përpara fillimit të sfidës me Italinë në shenjë respekti dhe mirënjohje për kapitenin e kombëtares ndër vite. Cana ka arritje të mëdha me fanellën kuq e zi,duke qenë kapiten edhe në momentin historik të kualifikimit në Evropianin ‘Francë 2016’, po ashtu edhe një rekord prej 93 ndeshjesh të luajtura.
Njoftimi i plotë i FSHF-së :
“Ish-kapiteni i ekipit kombëtar të futbollit Lorik Cana do të mbyllë zyrtarisht karrierën e tij në datën 9 tetor përpara ndeshjes zyrtare eleminatore SHQIPERI-ITALI.Me këtë rast, FSHF do të organizojë ceremoninë e posacme për mbylljen e karrierës të kapitenit të saj ndër vite, i cili numëron edhe rekordin e pjesëmarrjes me fanellën kuqezi të përfaqësueses, me 93 ndeshje. Përpara nisjes së takimit, një ceremoni speciale do të realizohet në vlerësim dhe mirënjohje për ish-kapitenin Lorik Cana”
