Në prag të ndeshjes mes Shqipërisë dhe Norvegjisë ka folur edhe ish-kapiteni legjendar i kuqezinjve, Lorik Cana. Ai ka mbështetur frymën e re që po sjell në kombëtare trajneri Panucci, po ashtu ka folur edhe për “konfliktin” me kombëtaren e Kosovës për talentet.
“Do përflitet gjithmonë. Vendimi se për kë do të luash është vendim që duhet të merret në fillim. Përderisa ka 2 kombëtare, nuk do të ketë problem se kë zgjedhin lojtarët, Shqipërinë apo Kosovën. Me rendësi është të përfaqësohen denjësisht, edhe pse ngjyrat kuqezi kanë qenë më të veçanta për simbolin që përfaqëson Shqipëria,” u shpreh Cana.
“Më jep një përshtypje pozitive. Me gjithë presionin që ka, e ka marrë me shumë dëshirë dhe është i angazhuar. Po sjell lojtarë të rinj dhe identitet të ri. Norvegjia? Mbetet gjithmonë një kundërshtar i mirë, që është edhe ai në ngritje. Për nga cilësia, mund të quhen njësoj si ne,” përfundoi ish-kapiteni.
