Kreu i Policisë së Shtetit, Haki Çako, ka pritur në një takim një Delegacion të Lartë të Policisë Turke të kryesuar nga Selami Altinok, Guvernator dhe Drejtor i Përgjithshëm i Sigurisë i Republikës së Turqisë.
Në fokus të takimit ishte diskutimi i çështjeve në interes të përbashkët për fuqizimin e mëtejshëm të bashkëpunimit dhe shkëmbimit të informacionit ndërmjet Policive të dy vendeve, në kuadër të luftës kundër terrorizmit, krimit të organizuar si dhe shkëmbimi i eksperiencave në fushën e Policimit.
Të dy drejtuesit kanë nënvizuar gatishmërinë që të thellojnë edhe më tej luftën kundër elementëve radikalë, si dhe të orientohen qartazi drejt partneritetit në të gjitha vendet e rajonit , si dhe në një front, në luftë kundër të gjithë këtyre fenomeneve që shqetësojnë dhe cenojnë sovranitetin dhe sigurinë kombëtare.
“Unë uroj dhe dëshiroj që kjo vizitë të kontribuojë shumë në zhvillimin e mëtejshëm të bashkëpunimit që vazhdon prej një kohe të gjatë midis dy Drejtorive të Përgjithshme të dy institucioneve tona. Marrëdhëniet tona po vazhdojnë në të gjitha fushat në një mënyrë të përkryer.
Ka patur një bashkëpunim shumë të mirë dhe intensiv në fushën e trajnimeve midis dy Drejtorive të Përgjithshme”, u shpreh Altinok.
Në fund të takimit, Guvernatori dhe Drejtori i Sigurisë së Republikës së Turqisë shprehu kërkesën që gjatë vitit 2018 të mblidhet Komisioni i Përbashkët për Sigurinë dhe ky Komision të mblidhet në Turqi, kërkesë që u mirëprit dhe u vlerësua si shumë e vlefshme nga Drejtori i Policisë së Shtetit, Haki Çako.
