Flamurtari mposht Teutën e Maganit, Busic autor i dy golave. Mbas dy fitoreve radhas, u krijua idea e një skuadre mjaft të fortë ajo e durrsakëve, por Duro i mposht në “Niko Dovana” dhe i kthen me këmbë në tokë. Ndeshja përfundon 2-1 në favor të vlonjatëve. Kërkonte fitoren e 3-të radhazi Gugash Magani por në Niko Dovana kishte një fillim ëndrrash për Flamurtarin që kalonte në avantazh që në minutën e tretë me Kamara që pasoi nga brenda zonës me Bushic që shënoi thjesht, bukur dhe saktë me të majtën.
Flamurtari në avantazh për zhgënjimin e Maganit me Teutën që has vështirësi për të reaguar dhe tenton portën pas 20 minutash me një goditje nga distanca të Hrkac. Kërkon të rikthejë ekuilibrin Teuta që provon në të 24 me Cyrbjen që godet në diagonale por pret Nurkovic. Pas dy fitoreve i duhet të ndjekë Maganit me Danilon që në minutën e 34 gabon nga brenda zonës kur vonohet me topin duke shpërdoruar, reagimi i Shpëtim Duros nuk është se ka shumë nevojë për koment, kërkon gjithmonë më tepër nga sulmuesi brazilian. Megjithatë për ti kthyer humorin mendon Tomislav Busic që këtë herë për asistin i duhet të falënderojë Siljanovskin.
2-0 dhe është padyshim moment çlirimi për Flamurtarin, me Duron që mund të marrë frymë lirisht, të dy trajnerët bëjnë të njëjtin gjest ndërsa shprehja për ujë të ftohtë vlen vetëm për Maganin. Teuta tani ska më se ctë humbasë dhe hidhet përpara por edhe Flamurtari kërkon golin që mbyll ndeshjen, nuk i del goditja nga brenda zonës Kamara. Pjesa e parë mbyllet me një pretendim të Teutës për prekje me dorë brenda zonës nga Pollozhani, por nuk ndan të njëjtin mendim kryesori Cjapi. Episod që meriton të rishihet.
Përfundon kështu me Flamurtarin në avantazh të dyfishtë pjesa e parë Në të dytën në fushë kthehet një Teutë më agresive që ushtron presing në kërkim të golit që rihap ndeshjen. Flamurtari ka gjithsesi një shans të mirë në të 59 me Kamaran që s’postohet në qendër dhe godet pa sukses, edhe pse mund të kishte kërkuar pasimin për Bushic .
Megjithatë vlonjatët tërhiqen në mbrojtje të rezultatit dhe Teuta fiton terren , me Shehajn që godet jashtë nga brenda zonës në të 62. Provon edhe Cyrbja 5 minuta më pas me një parabël interesante por që përfundon jashtë portës , nuk arrijnë të gjejnë shënjestrën e duhur futbollistët e Teutës megjithatë një ndihmë ju vjen në minutën e 74 kur Cyrbja tenton të futet në zonë por pengohet nga Pollozhani. Kontakti është jashtë zonës dhe kryesori Kreshnik Cjapi fillimisht akordon me të drejtë goditje dënimi, por më pas është anësori Enea Pashaj që sinjalizon për 11 metërsh dhe i tillë akordohet. Episod i denjë për të gjeneruar polemika.
Ka të drejtë në fakt të irritohet Duro pasi nga ajo penallti edhe pse Lena dështon në goditjen e parë, Hila shënon në të dytën dhe është një gol që rihap ndeshjen, pasuri shkon 2-1 dhe Teutës nuk i mungojnë rastet, në të 85 Shehaj është dy herë shumë pranë golit fillimisht me kokë dhe më vonë tenton sërish pas tentativës së Onyeke por pa sukses, drithërima për vlonjatët që ju duhet ët falënderojnë Nurkovic për këtë fluturim që shpëton portën në të 89. Flamurtari arrin të rezistojë dhe merr me vete një fitore me peshë, falë së cilës kap në kuotën e 6 pikëve në renditje pikërisht Teutën, me fitoren e dytë radhazi.
