Pak javë pas vdekjes së të riut Enea Ftoji, në ambientet e paraburgimit të Korçës, bashkëshortja e tij apelon për ndihmë e ndërsa kërcënon se do të var veten nëse nuk gjejnë strehim.
Bashkëshortja e tij Entela, me tre fëmijë të vegjël kërkon një vend ku të strehohet, pasi flenë në qiell të hapur. Përpos kësaj, ajo nuk ka asnjë të ardhur.
“Prej dy javësh fle së bashku me tre fëmijët jashtë. Flemë tek Pazari dhe në lulishte të qytetit.
Nuk kam asnjë të ardhur. Fëmijët ka disa ditë që nuk ushqehen, askush nuk më ka ofruar ndihmë. Kërkoj një shtëpi ku të strehohem bashkë me fëmijët, në të kundërt do var veten. Policia që më vrau burrin, të na vrasë ne të katërt”, ka rrëfyer e reja me lot në sy.
Pas vdekjes së të shoqit, ajo bashkë me fëmijët 5-vjeç, 3-vjeç dhe 1-vjeç, u larguan nga shtëpia e tij dhe për pak kohë u strehua tek prindërit. Nëna e tre fëmijëve thotë se i ka humbur shpresat, e nëse shteti nuk i gjendet pranë, atëherë ajo do të ndërrmarrë aktin e rëndë.
“Tani jetoj tek gjyshja, pasi prindërit e Eneas nuk kanë për vete mundësi ekonomike. Nëse shteti nuk merr masa për mua, unë do të varem me gjithë fëmijë. Nuk kam shpresë tjetër”, është shprehur ajo më herët.
Enea Ftoj, 27-vjeç, ndërroi jetë në ambientet e komisariatit, ndërsa familjarët akuzuan policinë se kishte ushtruar dhunë fizike ndaj tij.
