Ish-deputetja socialiste Valentina Leskaj, e ka cilësuar si të shëmtuar ngjarjen në Bularat, ku varrimi i ekstremistit Kacifas u kthye në një manifestim racist. E ftuar në emisionin “Ditë e re”, në “Ora News”, Leskaj u shpreh se respekton vendimin e qeverisë shqiptare. Por ndër të tjera ajo tha se nëse në Greqi do futeshin shqiptarë ekstremistë, situata do dilte jashtë normales.
“Është një ngjarje shumë e shëmtuar. Nuk do ndodhte në një vend tjetër. Në radhë të parë le të ndajmë pjesën tonë, jo vetëm qeveria por edhe shoqëria shqiptare që shkon përtej qëndrimeve të Greqisë.
Nëse do kishin kapërcyer shqiptarë në Greqi, do ishte shumë e rëndë. Jam e çuditur për atë zinë në Parlament, por dihet që kryetari e ka refuzuar, pastaj është gjetur një mënyrë ligjore për ta bërë. Për sa i përket palës sonë, respektoj qëndrimin”, tha Leskaj.
Më tej ish-deputetja foli edhe për bojkotin e opozitës në Parlament. Sipas saj, opozita po i bën dëm vetes. “Të them të drejtën, kur e shoh Parlamentin, nuk më merr malli në gjendje që është.
Do të thotë që padyshim ne kemi probleme të mëdha me Parlamentin që është gjysëm. Kjo nuk është mirë edhe për opozitën. Kur nuk ka opozitë, nuk është mirë për Shqipërinë dhe as për mazhorancën.
Nëse reformat miratohen vetëm nga njëra palë, nesër do vijë pala tjetër dhe do thotë e keni bërë ju. Unë do thosha që është një dëm i madh që opozita i bën vetes”, shprehet ajo.
