Një status në Facebook nga ish-presidenti i Shqipërisë, Bujar Nishani u bë shkak për një gjyq mes tij dhe trajnerit të kombëtares kuqezi Christian Panucci. Nishani e ka cilësuar italianin si sharlatan dhe se po shkatërron atë që është ndërtuar. Këto deklarata nuk janë kapërdirë nga Panucci dhe ka zgjedhur rrugën ligjore për të sqaruar çështjen, nga e cila kërkonte edhe 100 mijë euro dëmshpërblim për prishje të imazhit. Por para pak ditësh dosja e tij u kthye pas nga gjykata pasi kishte mungesë informacioni. I ftuar në emisionin “Fakt” të gazetarit Çim Peka, Nishani foli për rastin në fjalë.
Çfarë iu shtyu të komentonit Christian Panuccin?
Kam pasur një bashkëbisedim në Facebook-in tim privat, me miqtë e mi, aty kam shprehur një opinion për shkak të disa rrethanave. Besoj se është në të drejtën time të jap opinionet e mia me miqtë e mi në rrjete sociale.
Di të them se grupi i avokatëve të mi po përgatitet seriozisht për këtë çështje. Është një çështje që ia vlen dhe do të jetë shumë interesante kur të zhvillohet në sallën e gjyqit.
A do e tërhiqnit atë koment?
Jo, absolutisht. Nuk shoh asnjë arsye për ta tërhequr atë opinion që kam shprehur në këtë bashkëbisedim. Ajo që më duhet të iu them, është që vërtet po përgatitem seriozisht sepse është një çështje që duhet përgatitur seriozisht.
Në rast se do të ishit Presidenti i Shqipërisë dhe Christian Panucci do të vijë të kërkojë shtetësinë shqiptare si trajner i Shqipërisë. A do bënit të njëjtën gjë që keni bërë me Gianni De Biasin?
Patjetër. Shtetësinë patjetër. Ndërsa çështja e nderimit dhe e vlerësimit ka kritere të tjera.
