Analisti i politikave ndërkombëtare nga Uashingtoni, Janusz Bugajski ka dhënë alarmin për sa i përket cështjes së demarkacionit, i cili sipas tij lidhet drejtpërdrejt me proceset e tjera integruese të Kosovës.
Analisti ka deklaruar se institucionet dhe Kuvendi i Kosovës duhet ta përfundojën sa më shpejt çështjen e demarkacionit me Malin e Zi, pasi çdo vonesë do të ketë pasoja për të ardhmen e vendit dhe për proceset integruese.
“Demarkacioni duhet të kryhet sa më shpejt sepse është çështje shumë e rëndësishme për Kosovën. Është shumë me rëndësi për këtë Qeveri që të mos anashkalojë këtë çështje”, deklaroi Buganjski për RTK.
Më tej, ai shtoi se mosratifikimi i marrëveshjes së Demarkacionit, përveçse do të ndikonte mbi Kosovën në mënyrë negative, nga ana tjetër do të ndihmonte Serbinë që të izolojë Kosovën në mënyrë ndërkombëtare.
“Do të ndihmojë Rusinë në ofensivën e saj që të destabilizojë rajonin. Kjo do të ndajë Kosovën jo vetëm nga çështja e liberalizmit, marrëveshja e Stabilizim Asociimit, por edhe mund të shtyjë Kosovën drejt një konflikti me një vend anëtar të NATO-s. Pastaj do të kërcënojë transformimin e FSK-së dhe anëtarësimin e Kosovës në NATO”, ka thënë Bugajski.
