Britania e Madhe është pozicionuar edhe njëherë kundër Rusisë dhe krah Ukrainës. Sekretari i Mbrojtjes së qeverisë britanike, Gavin Williamson tha se anija luftarake e Ushtrisë Mbretërore e dërguar në Ukrainë do ta japë një mesazh të fuqishëm për presidentin rus, Vladimir Putin.
Luftanija ka hyrë në ujërat e Detit të Zi gjatë këtij muaji, pasi Rusia rrëmbeu tri anije ukrainase. Sekretari Williamson vizitoi luftanijen në portin e Odesas. Ai tha se prania e saj tregon përkrahje për Ukrainën përballë rritjes së agresionit rus.
Përpos kësaj, ai deklaroi se në këtë zonë do të vendosen edhe luftanije të tjera për ta rritur praninë e Britanisë së Madhe në Detin e Zi. NATO kohët të fundit e ka shtuar numrin e operacioneve në Detin e Zi duke e rritur edhe numrin e patrullimeve me anije lufte.
Tensionet mes Rusisë dhe Ukrainës mbesin të larta për shkak të qasjes në brigjet e Krimeas. Krimea dikur ishte pjesë e Ukrainës, por u aneksua nga Rusia në vitin 2014. Sidoqoftë, Ukraina thotë se Krimea është ende pjesë e territorit të saj, shkruan “BBC”.
