Kur qeveria e Mbretërisë së Bashkuar përjashtoi të gjitha opsionet e daljes miqësore të BE-së, ashtu si mbetja në Zonën Ekonomike Evropiane (EEA), ishte e qartë se i vetmi rezultat i mundshëm do të ishte dalja me kushtet e OKB-së. Tashmë, ky është drejtimi ku Mbretëria e Bashkuar po shkon në mënyrë të pashmangshme
Pas dorëheqjes formale të Britanisë, të mërkurën më 29 mars 2017, Bashkimi Evropian ka planifikuar qëndrimin e saj për të negociuar daljen e Mbretërisë së Bashkuar nga blloku. Në shikim të parë, drafti i udhëzimeve për negociata duket miqësor dhe i arsyeshëm. Por mos u mashtroni. Ato përmbajnë një kurth me të cilin ndjekësit e negociatave të paketës greke të shpëtimit duhet ta kenë shumë të njohur.
Në këtë pikë, mbështetësit Brexit pa dyshim do të bërtasin “Britania e Madhe nuk është si Greqia!”. Sigurisht që s’është. Mbretëria e Bashkuar është një nga ekonomitë më të mëdha në Evropë, dhe largimi i saj nga BE do të lërë një plagë të madhe që do të marrë kohë për t’u shëruar. Një dalje e qetë dhe e rregullt është në interesin e të gjithëve, për të minimizuar dëmin nga të dyja palët dhe për të ndihmuar shërimin e saj. Kjo pra është ajo që Mbretëria e Bashkuar dhe BE-ja thonë se duan. Atëherë, pse them se është një kurth?
Thelbi i negociatave greke është se, lehtësimi i borxhit, që Greqia kaq dëshpërimisht ka nevojë, kushtëzohet nga fakti se Greqisë i duhet të plotësojë të gjitha kushtet e kreditorëve të BE-së, në mënyrë të plotë. BE-ja as që do të diskutojë lehtësim borxhi, derisa të jetë bërë përparim i mjaftueshëm në çdo gjë tjetër. Çdo herë që Greqia i afrohet lehtësimit të borxhit, menjëherë i largohet, ose duke i shtuar kushte të reja, ose duke gjetur arsye për të dyshuar se kushtet kanë qenë vërtet të plotësuara./Monitor.al
