Lista e bërë publike nga trajneri i Brazilit, Tite ka pasur mjaft surpriza dhe rikthime të befasishme. Listës së lojtarëve që do të marrin pjesë në miqësoret e radhës i janë shtuar 3 debutues dhe padyshim dyshja e mesfushës që po kalojnë një formë të jashtëzakonshme Coutinho dhe Willian.
Përfshirja e portierit të Valencias, Neto, si dhe kapiteni 32 vjeçar i Gremios Pedro Geromel, ishin gjithashtu emra që nuk priteshin në listën e Brazilit. i pari mungon prej 8 vjetësh në kombëtare ndërsa Geromel ka luajtur vetëm një ndeshje për bamirësi, atë për viktimat e tragjedisë ajrore të Shapekoense.
Trajneri i Selesaos ka surprizuar jo pak me emrat që do ti besojë për sfidat ndaj Rusisë dhe Gjermanisë këtë muaj. Sulmuesi i Real Sociedad Willian Joze dhe mesfushori i Beshiktashit, Anderson Taliska fituan besimin e seleksionerit Tite, ndërsa zgjerohet edhe armata e kandidaturave për të qenë në botërorin e kësaj vere.
“Willian Joze’ dhe Taliska sjellin në skuadrën tonë kualitet të ndryshëm, sidomos në finalizim dhe në topat në ajër me avantazhin ndaj mbrojtësve” tha trajneri i kombëtares karioka.
Brazili ka dy sfida vërtet speciale këtë muaj. Ekipi karioka luan në Moskë ndaj organizatores së botërorit, Rusisë mbrëmjen e 23 Marsit ndërsa më pas përballet me kampionen në fuqi të botës, Gjermaninë, në Olimpiashtadion të Berlinit 4 ditë më vonë. Selesao në botëror do të ketë premierën në 17 qershor ndaj Zvicrës, para se të luajë me Kosta Rikën dhe Serbinë.
