Greva është organizuar kundër reformave të propozuara nga presidenti Michel Temer për pensionet, por qeveria braziliane argumenton se reformat janë të nevojshme për të nxjerrë vendin nga recesioni më i keq në histori.
Brazili është përfshirë nga dhuna. Autobusë, makina e blloqe rrugore janë vënë në flakë nga aktivistët, të cilët gjithashtu dëmtuan edhe dyqanet përreth.
Greva e tyre, pjesën më të madhe të kohës, mbajti tone kryesisht paqësore, por shumë njerëz qëndruan në shtëpi dhe shkollat, dyqanet e bankat u mbyllën përqark gjithë vendit.
Presidenti, Michel Temer, u shpreh i penduar për incidentet në Rio, por ai theksoi se do të vijonte përpjekjet për modernizimin e vendit. Sipas tij, qeveria po punon që vendi të dalë nga recesioni më i keq në histori.
Por, Sindikatat e punëtorëve thonë se më të varfërit në Brazil, do të mbajnë mbi shpatulla koston e këtyre ndryshimeve, të cilat përfshijnë edhe rritjen e moshës së daljes në pension dhe reduktimin e përfitimeve. Sakaq, qeveria argumenton se masat janë të nevojshme për të shmangur një kolaps në sistemin e pensioneve. Efektet e grevës janë ndjerë në mbarë vendin, por sipas qeverisë, kjo nuk do të ndikojë aspak në realizimin e reformave.
Presidenti Temer, gjatë kësaj jave, fitoi një votim parlamentar në mbështetje të reformave të tij me një diferencë të madhe.
