Kryeministri Rama ka komentuar braktisjen e Konferencës së Kryetarëve nga partitë opozitare.
Me anë të një postimi në Facebook, Rama shkruan se do të donte debat për projekt buxhetin e 2018-ës, por ka vetëm ftesën e vjetër për sherr politik.
“Do donim debat me përgjegjësi për Projekt-Buxhetin2018 po kemi vetëm ftesën e vjetër për sherr politik! Politika jonë është puna jo sherri”, shkruan Rama.
Partitë opozitare e kanë cilësuar si të pakuptimtë qëndrimin në mbledhje, teksa thanë se qeveria është e lidhur me krimin.
Deputeti Edomond Spaho tha se nuk mund të jenë pjesë e Konferencës së Kryetarëve, pasi kjo qeveri është e lidhur me krimin dhe moralisht ka rënë:
“Ne si opozitë nuk mund të sillemi sikur jemi në kushte normale. Gjendja në vend është e rëndë. Si rrjedhojë e ngjarjeve të fundit është vërtetuar lidhje e kësaj mazhorance me krimin e organizuar dhe trafikun e drogës.
Për opozitën kjo qeveri moralisht ka rënë. Puna më e mirë që mund të bëjë është të japë dorëheqjen që t’i hapë rrugën një qeverie antimafie si dhe të krijojë kushte për zgjedhje të lira dhe të ndershme.
Jo vetëm ka rënë moralisht, por nuk është edhe një qeveri legjitime sepse është një mazhorancë e ardhur nga zgjedhje të blera. Për rrjedhojë ne nuk mund të bëhemi pjesë e kësaj fasade dhe nuk do të marrin pjesë në Konferencën e Kryetarëve për shqyrtimin e pr/buxhetit 2018.”
I njëjtë ka qenë edhe qëndrimi i LSI-së, teksa Petrit Vasili theksoi në një konferencë për mediet se Rama as nuk ka denjuar ta firmosë dokumentin e propozimit të projektligjit për buxhetin e 2018-ës:
“Siç çdo qytetar e di, dokumenti më i rëndësishëm që një qeveri apo kryeministër paraqet para vendit është pikërisht ligji i buxhetit të shtetit.
Opozita nuk mund të vazhdojë të jetë pjesë në këtë shqyrtim, veç arsyeve politike e madhore pasi ky shtet është i kapur dhe i bërë njësh me trafikun, por edhe për arsyen themelore se kjo qeveri nuk ka të bëjë me interesat e qytetarëve.
Nuk i kam parë kurrë më qesharakë kolegët e rilindjes. Këtë dokument kryeministri as nuk ka begenisur ta firmosë. Ky dokument flet qartë, nuk keni parë gjë, kur ai bojkoton dokumentin e qeverisë ë tij, ne nuk mund t’i bëjmë fresk atij që s’ka kohë të firmosë, pse s’e merr seriozisht? Ky dokument nuk është i kryeministrit tuaj, nuk ka pasur kohë ta firmosë.
Ky dokument nuk është i kryeministrit tuaj. Ai nuk di gjë fare ça është shkruar. Ditë e zezë për vendin kur kryeministri nuk mendon për popullin”, tha Vasili.
