Shumë lojtarë cilësorë edhe pse janë thirrur apo kanë qenë pjesë e ekipeve zinxhirë të Kombëtares shqiptare, në fund kanë zgjedhur një shteti të huaj për të pasur një karrierë më të madhe europiane. Bujën më të madhe e ka bërë Sotir Nini i cili edhe pse kishte marrë shumë ftesa nga Shqipëria, zgjedhja e tij ishte Greqia. Më pas një talent që kërkoi të bënte emër dhe të bashkohej me Italinë, por më pas i humbi gjurmët dhe nuk u dëgjua më për të, Elvis Kabashi.
Tani historia përsëritet sërish në shtetin fqinj grek dhe është Enea Mihajn protagonist. Mbrojtësi 19-vjeçar i Shqipërisë U-21, i cili ka qenë pjesë e kombëtares Shpresa në ndeshjet kundër Izraelit U-21 në tetor 2016 dhe kundër Islandës në tetor 2017, tashmë duket se na ka braktisur.
Luan në Superligën greke dhe është titullarë i padiskutueshëm tek Panetolikosi. Është i lidhur me një transferim tek ekipi i shqiptarit tjetër Ergys Kaçe, PAOK-u i Selaniku dhe konsiderohet si një mbrojtës me një të ardhme të madhe.
Ndoshta elozhet kanë hapur oreksin e federatës greke, sepse ditët e fundit mediat greke shkruajnë se Mihaj ka vendosur të braktisë kombëtaren U-21 të Shqipërisë, pasi dëshiron të luajë për Greqinë. Sipas gazetave greke, Mihaj ua ka shprehur dëshirën shokëve të skuadrës.
Sipas medias greke “Sport24.gr” Enea Mihaj është në pritje të një ftese nga Kombëtarja greke dhe jo nga ajo shqiptare. Ja çfarë shkruan kjo media në artikullin dedikuar lojtarit Enea Mihaj.
“Mihaj, që luan me Panatolikosin, ka luajtur me ekipet e moshave të Shqipërisë, por nga tani e tutje ai dëshiron të veshë fanellën bardheblu të Kombëtare greke. Mbrojtësi 19-vjeçar është rritur në vendin tonë dhe ai ka informuar njerëzit përgjegjës dhe tani po pret një telefonatë në të ardhmen nga trajneri i Kombëtares. Ëndrra e tij është që të përfaqësojë një herë flamurin tonë.”
Kujtojmë që disa kohë më parë mediat greke kanë shkruar edhe për sulmuesin shqiptar, Florin Durmishaj, që luan me Panionosin, duke aluduar se kombëtarja greke është e interesuar për të.
