Salloni i Librit në Torino, më i madhi në Itali dhe një nga më të njohurit në nivel europian, ofroi një mundësi shumë të mirë për prezantimin e librit “Notturno” të ish-Presidentit të Republikës, Bamir Topi, i cili është përkthyer së fundi në italisht nga Shtëpia Botuese “Morrone”.
Të pranishëm ishin njerëz të kulturës dhe autoritete politike të rajonit të Piemontit.
Kritikët e artit e vlerësuan me nota tepër pozitive sjelljen në italisht për dashamirësit e librit, si italianë ashtu edhe shqiptarë që jetojnë në mbarë Italinë.
Libri sjell panoramën komplekse të politikës, institucioneve dhe shoqërisë shqiptare në një hark kohor të tranzicionit deri në vitet e fundit, si dhe ngjarjet më të rëndësishme që kanë shoqëruar jetën politike të ish-Presidentit Topi gjatë viteve që ka qenë në zyrën e kreut të shtetit.
Pa dyshim, analizat për raportet problematike të qeverisë me opozitën, periudha e anëtarësimit në NATO apo Pavarësisë së Kosovës, e deri te ngjarjet tragjike të 21 janarit 2011, zënë vend qendror.
Në libër trajtohet niveli i demokracisë në Shqipëri dhe sindroma e kthimit real nga një Republikë Parlamentare në të ashtuquajturën Republikë e Kryeministrit, si dhe raportet e acaruara në dëm të institucioneve të pavarura.
Një vend interesant në libër zënë bisedat me liderë botërorë dhe jeta komplekse në shumë dimensione shoqërore e autorit — në politikë, art, kulturë dhe sport.
Botuesit Morrone, Firera e të tjerë vlerësuan këndvështrimin realist të ngjarjeve, kurajën për të thënë të vërtetat reale dhe konstatimin se politikanët kryesorë, kur nuk janë të veshur me pushtet, sillen përgjithësisht në mënyrë normale, por kur vishen me pushtet të madh, arsyeja e tyre errësohet pikërisht nga fuqia pa kufi.
