Një ditë më parë, Rama dha lajmin e mirë se fëmijët që vijnë në jetë nga 1 Janari i vitit 2019, nuk do të marrin më 50 mijë lekë të vjetra, por 8-fishin e tyre. Sakaq, Ministrja e Shëndetësisë, Ogerta Manastirliu, në një intervistë të dhënë në “ABC News”, u shpreh se sot u bë prezantimi i politikës së re, dhe se tani po punohet për skemën se si do të jepet ky bonus.
“Sot u bë vetëm prezantimi i politikës së re. Ne jemi duke elaboruar një skemë se si do të jepet ky bonus. Do të përpiqemi që ta japim në mënyrë të shpejtë, qoftë edhe nëpërmjet sistemeve dixhitale që duam të fusim në maternitete”, u shpreh ministrja.
Po kështu ajo nënvizoi se bonusi do të jetë i plotë dhe i patatueshëm.
“Do të jetë i tatueshëm ky bonus”?
“Ky do të jetë një bonus, skema e të cilit është duke u punuar së bashku me ekspertët e Ministrisë së Financave dhe Ekonomisë, dhe do të jetë një bonus i plotë për familjet”.
“Ju e keni vendosur këtë”?
“Ne e kemi vendosur këtë”.
“Pra bonusi nuk do të tatohet”.
Kryeministri tha se fëmija i parë i një familje do të përfitojë 400 mijë lekë, i dyti 800 mijë lekë, ndërsa i treti 1 milion e 200 mijë lekë.
