Koordinatori i Programit Ekonomik në Partinë Demokratike, Dorian Teliti, kritikoi qeverinë lidhur me shpërblimet e fundvitit dhe masat për pensionistët dhe punëtorët me paga të ulëta.
Sipas Telitit, shpërblimet e fundvitit, dikur një praktikë e zakonshme, janë kthyer tashmë në një “bonus elektoral,” që shpërndahet vetëm në prag të zgjedhjeve. “Qeveria kujtohet që pensionistët janë të varfër vetëm kur afrohen zgjedhjet,” u shpreh ai.
Teliti gjithashtu përmendi situatën alarmante të varfërisë në Shqipëri, duke cituar të dhëna nga UNICEF, që tregojnë se 47% e fëmijëve shqiptarë janë të kequshqyer për shkak të kushteve të vështira financiare të familjeve. Duke krahasuar periudhën kur Partia Demokratike ishte në pushtet, Teliti deklaroi se varfëria ishte zbutur, bazuar në të dhënat e Bankës Botërore. Ai kritikoi rritjen e pamjaftueshme të pensioneve gjatë qeverisjes së Ramës, duke theksuar se rritja e çmimeve ka përkeqësuar situatën për pensionistët dhe shtresat e varfra.
Në fund, ai e cilësoi edhe bonusin e pranverës si një tjetër lëvizje elektorale.
“Kemi kërkuar nga mazhoranca që kur kemi kaluar në opozitë që qeveria të vijojë me shpërblimet e fundvitit. Këto të fundit janë një kujtim i të kaluarës tashmë, por duke qenë se jemi afër zgjedhjeve, qeveria u kujtua që pensionistët qenkan të varfër dhe u mundua të gjejë ato paratë për bonusin elektoral. E njëjta gjë po bëhet me punëtorët e administratës publike për ata që kanë paga të ulëta, afër minimales.
Bonusi i pranverës është po ashtu një lëvizje elektorale. PD e zbuti varfërinë kur ishte në qeveri, këto janë shifra të Bankës Botërore. UNICEF thotë se 47% e fëmijëve shqiptarë janë të kequshqyer. Kjo vjen si pasojë e mangësive financiare të familjeve. Jemi në një situatë alarmante. Kjo vlen edhe për pensionistët, sa janë rritur pensionet gjatë qeverisë së Ramës? Çmimet janë rritur shumë më shumë. Praktikisht pensionistët janë varfëruar më shumë”, u shpreh ai.
