Aktori Armend Baloku është gjobitur me 444 euro nga Teatri Kombëtar i Kosovës. Gjoba vjen pasi aktori bojkotoi shfaqjen “Bordel Ballkan”, duke kthyer mbrapsht dhjetëra spektatorë, të cilët prisnin fillimin e shfaqjes.
Kështu, TKK u detyrua të anulojë dhënien e shfaqjes, ndërsa drejtori Agim Sopi i dërgoi Ministrisë së Kulturës vendimin për gjobitjen e aktorit të mërkurën.
Gjobitja është kundërshtuar nga aktori Baloku, për të cilin drejtori i përgjithshëm, Agim Sopi dhe udhëheqësi artistik Agon Myftari nuk janë njerëz të denjë për ta udhëhequr Teatrin Kombëtar të Kosovës.
Drejtori Agim Sopi ka thënë se në bazë të Rregullores, aktori që nuk vjen në reprizë të shfaqjes pa arsye detyrohet të paguajë gjysmën e biletave, në rastin e dytë, të gjitha biletat dhe në rastin e tretë i ndërpritet kontrata e punës.
“Pasi salla e TKK-së ka 296 karrige, Baloku do t’i paguajë gjysmën e biletave, që i bie për 148 karrige nga tri euro, që i bie 444 euro”, ka thënë Sopi, shkruan KohaDitore.
