Deputeti i Partisë Demokratike, Luçiano Boçi, në një intervistë për Tirana Today, vlerëson se edhe me ardhjen në Tiranë të dy negociatorëve ndërkombëtarë, është e vështirë për të pasur një fillim diskutimi me PS-në, pasi kushti kryesor i opozitës është qeveria teknike.
Lidhur me protestën e ditës së nesërme, deputeti demokrat është shprehur se policia nuk duhet dhe nuk mund të kërcënojë me burg të drejtën kushtetuese të qytetarëve për të protestuar për liritë e të drejtat e tyre.
Me ardhjen në Tiranë të dy negociatorëve ndërkombëtarë, zëvëndëspresidentit të PPE-së, David McAllister dhe raportuesit për Shqipërinë në Parlamentin Europian, Knut Fleckenstein, a ka shpresë për fillim të negociatave me PS-në?
Shpresat për të pasur fillim negociatash mbi bazën e ngritjes së qeverisë teknike duket se po përvijohen.
Megjithatë, dublimi i z.McAllister me z.Fleckenshtein, i cili është prezantuar si paragjykues i veprimeve e kërkesave të opozitës, e sfumon disi optimizmin.
Gjithsesi, ne mirëpresim çdo negociatë që ka synim realizimin konkret të zgjedhjeve të lira e të ndershme dhe largimin e Ramës.
Vendosmëria jonë për qeveri teknike nuk është kusht, por është porta ku hyhet për të realizuar atë që të gjithë e kërkojnë: “drejtësi vote e zgjedhje”.
A ka ndonjë udhëzim nga PD-ja për protestuesit nesër?
Protestuesve iu është kërkuar të ruajnë qetësinë e të mos provokohen.
Tubimet janë krejtësisht paqësore dhe mesazhi ynë i qartë.
Simbolika një orëshe është fillimi i një mosbindje civile që do shtrihet përtej së nesërmes.
Si e komentoni ju deklaratën e Policisë së Shtetit?
Policia nuk duhet dhe nuk mund të kërcënojë me burg të drejtën kushtetuese të qytetarëve për të protestuar për liritë e të drejtat e tyre.
Ajo ndërhyn vetëm në raste të tejkalimeve në dhunë dhe nuk mund të pengojë asnjë grumbullim paqësor.
Madje, përkundër deklaratave dhunënxitëse për burgosje e filmime, për të realizuar funksionin e saj, ajo duhet të bashkëpunojë në mbarëvajtjen e protestës.
Protesta nuk është kundër policisë e as kundër pjesës së njerëzve që gjenden atë moment në rrugë.
Ajo është kundër qeverisë Rama, është për lirinë e votës e drejtësinë e zgjedhjeve.
Intervistoi: Orest Çipa/Tirana Today
