Ka disa pretendime se prodhuesit më të mëdhenj të makinave në Gjermani mund të ketë formuar një kartel që prej viteve ‘90, duke rënë dakord për gjithçka që nga zhvillimi i makinave dhe motorëve, funitorët apo sistemet e gazrave. Zyrtarët antimonopol konfirmuan se po i hetojnë këto pretendime.
Në objektivat kryesorë të hetimit janë ikonat e industrisë së makinave, jo vetëm gjermane po edhe botërore, pikërisht Mercedez Benz, BMW dhe Volkswagen.
“Komisioni europian dhe zyra gjermane e karteleve kanë marrë informacion për këtë çështje që po vlerësohet. Është e parakohshme që të spekulojmë më tej”, shkruhet në një komunikatë të Komisionit Europian. Bashkëpunimi i mundshëm mes tyre filloi të krijojë dyshime nisur nga takimet qindra menaxherëve dhe shefave nga këto tre kompani, të cilët kanë marrë pjesë së bashku në dhjetëra grupe pune industriale.
Sipas “Der Spiegel”, qëllimi ishte pezullimi i konkurrencës. “Spiegel” boton një letër që Volkswagen i dërgon një zyrtari antimonopol verën e shkuar, në të cilën prodhuesi më i madh i makinave në botë pranon mundësinë e sjelljes anti konkurrencë. Tre kolosët e industrisë së makinave nuk kanë komentuar hetimin antimonopol, por thjesht publikimi i tij ndikoi mjaft në bursa ku të treja kompaninë kanë pësuar humbje të ndjeshme.
