Kreu i LIBRA-s Ben Blushi ka akuzuar partitë e mëdha, duke i cilësuar ato si grupime banditësh që grabisin çdo ditë, pasurinë e përbashkët të shqiptarëve.
Në një takim me mbështetësit e tij në Durrës, Blushi vuri në dukje se sot, vendi është i paralizuar institucionalisht. Ndërsa theksoi se krerët e forcave të mëdha politike nuk ulen të dialogojnë, por kanë vetëm si synim të grabisin votën e qytetarëve.
“A ka një vend të Evropës që mban 25 vite një kasë politike? Votoni për PD do grabiteni. Për PS do abuzoheni. Për LSI shumë më shumë prona do t’u merren. Shqipëri është shkatërruar nga çdo pasuri. Tani po sekuestron dhe të drejtën e votës. Nuk po shkojmë dot në zgjedhje. Kjo vjen për shkak të një konflikti të vjetër dhe të ricikluar mes dy forcave politike. Kemi qeveritë më të korruptuara. Në Shqipëri mund të mos ketë fare zgjedhje. E kanë fajin dy partitë e vjetra, sepse e vetmja gjë që bëjnë është që ndryshojnë vetëm karriget”, tha Blushi.
Ai paralajmëroi se në fundin e kësaj jave, qeveria do të përgjysmohet, pasi kreu i LSI-së, Ilir Meta, do të largohet nga koalcioni qeverisës.
“Kur ka kriza në Francë burrat ulen. Pse këta nuk ulen për ta zgjidhur krizën? Kërkojmë të ketë zgjedhje. Të ketë dialog për të pasur zgjedhje. Kërkojmë të ketë ndryshim në mënyrën se si numërohen votat. Kërkojmë të mos ketë deputetë kriminelë dhe banditë. Presidenti nuk therret asnjë tryezë. Ka dhe dy muaj punë. Ai nuk e bën sepse është i njërës palë. Sot jemi në një pikë ku institucionet janë bllokuar. Në fund të kësaj jave mund të kemi gjysmën e qeverisë sepse gjysma mund të tradhëtojë pjesën tjetër.”
