Partia LIBRA, e drejtuar nga Ben Blushi, e ka cilësuar shtyrjen e regjistrimit të koalicioneve nga ana e PS dhe LSI, si një atentat që po u bëhet zgjedhjeve parlamentare.
Sipas kësaj partie, ky veprim do të thotë shtyrje e procesit zgjedhor të 18 qershorit. Ndërsa thekson se nëse KQZ merr parasysh këtë kërkesë, dëshmon edhe njëherë varësinë politike të këtij institucioni. “Të shtysh 18 prillin, është njëlloj si të shtysh 18 qershorin”, thekson LIBRA.
LIBRA denoncon këtë tentativë, e cila, sipas saj, nuk bëhet për të përmirësuar standartet zgjedhore, por për të mbyllur llogaritë e koalicionit qeveritar, i cili po saboton zgjedhjet me marrëveshje.
Deklarata e plotë
Dy partitë që qeverisin prej katër vitesh, i kanë kërkuar sot KQZ të ndryshojë afatet e rregjistrimit të koalicioneve zgjedhore.
LIBRA gjykon se kjo kërkesë, të cilën KQZ me sa duket do ta marrë parasysh, dëshmon për varësinë politike të këtij institucioni nga qeveria dhe cenon standartet zgjedhore pa nisur zgjedhjet.
Të shtysh afatin e regjistrimit të koalicioneve pas datës 18 prill është njëlloj si të shtysh 18 qershorin.
Kjo kërkesë antiligjore, e cila i fut zgjedhjet në një rrugë të panjohur, nuk mund të ketë asnjë efekt, pasi KQZ nuk e ka tagrin të shtyjë një afat të përcaktuar në mënyrë të qartë nga Kodi Zgjedhor i Republikës, i miratuar me 3/5 e Parlamentit.
LIBRA denoncon këtë tentativë, e cila nuk bëhet për të përmirësuar standartet zgjedhore, por për të mbyllur llogaritë e koalicionit qeveritar, i cili po saboton zgjedhjet me marrëveshje.
Në kushtet kur vendi po mbetet pa President, pa Zgjedhje, pa Sistem Drejtësie, LIBRA e konsideron këtë akt, një grusht shteti të partive në pushtet dhe të një partie në opozitë, të cilat po sabotojnë institucionet për shkak të korrupsionit, dhe frikës nga drejtësia.
Ne do bëjmë gjithçka që zgjedhjet të zhbllokohen, që shqiptarët të kenë një President të mbështetur nga populli, që shqiptarët të kenë mundësi të zgjedhin të lirë duke rrëzuar kastën e tre partive të vjetra, të cilat nuk kanë aftësi t’i afrojnë vendit stabilitet dhe progress.