Kreu i LIBRA-s, Ben Blushi, i ka kërkuar liderit të Partisë Demokratike, Lulzim Basha, t’i japë firmat e opozitës në mënyrë që vendi, sipas Blushit, të shkojë njëkohësisht në zgjedhje parlamentare dhe presidenciale. Përmes një postimi në rrjetin social Facebook, Blushi thekson se iniciativën për të ndryshuar zgjedhjen e presidentit e ka propozuar ai qershorin e vitit të kaluar, së bashku me një grup deputetësh, dhe nuk iu pranua si propozim. Për këtë arsye, ai i kërkon Bashës të bashkojnë firmat dhe të bëjnë të mundur që qytetarët të zgjedhin në një ditë edhe Parlamentin, edhe Presidentin.
Ftesa e Blushit:
Lulzim Basha ka pranuar sot që Presidenti duhet të zgjidhet nga populli. Në qershor bashkë me Moza Hafizin, Arta Daden, Dashamir Shehin,Vangjel Dulen, Agron Dukën, Luljeta Arapin, Nard Ndokën, Tahir Muhedinin dhe Eduart Selamin kemi depozituar në Kuvend një amendament kushtetues për të ndryshuar mënyrën e zgjedhjes së Presidentit. Partia Demokratike nuk pranoi ta mbështeste njëlloj si Rilindja dhe LSI. Amendamenti kërkonte 28 firma dhe nuk u fut në votim. Me vjen mirë që PD ndryshoi mendim dhe e ftoj të na japë firmat e duhura për të shkuar në zgjedhje parlamentare dhe presidenciale njëkohësisht në të njëjtën ditë qoftë 18 qershor apo kurdo. Populli le të zgjedhë!
