Për shkak të mungesës së etiketave, datës së prodhimit dhe skadimit, mësohet se është bllokuar 10 tonë miell të ardhur nga Greqia. Autoriteti Kombëtar i Ushqimit ka bllokuar një ngarkesë prej 10 ton miell gruri, për shkak të parregullsisë në dokumentacion. Të dhënat nuk korespodonin me të dhënat në etiketë e kundraetiketë të produktit.
“Trupa inspektuese e AKU-t në Korçë, gjatë kontrollit të ushtruar në Pikën Doganore Kapshticë, konstatoi se një subjekt, i cili pretendonte të fuste në Shqipëri produktin “miell gruri”, kishte parregullsi në vërtetësinë e dokumentacionit që shoqëronte ngarkesën, konkretisht, raporti i analizës.
Nga kontrolli fizik i produktit “miell gruri”, rezultoi se ky produkt nuk kishte nr.loti, datë prodhimi dhe datë skadimi të stampuar në thasët prej letre 25 kg, por vetëm një kundraetiketë të ngjitur në gjuhën greke, pa përkthim në gjuhën shqipe”.
Ndodhur në këto kushte, është bërë i mundur bllokimi i ngarkesës me sasi 10 ton, duke u bazuar në legjislacionin në fuqi; gjithashtu do të ndiqen procedurat doganore për kthimin në origjinë.
