Franca po përgatitet për një ditë trazirash intensive sot, ndërsa protestat “Blloko gjithçka” pritet të ndërpresin transportin dhe shërbimet thelbësore në shenjë proteste ndaj masave shtrënguese të qeverisë.
Lëvizja ” Bloquons tout ” e cila u shfaq në mediat sociale gjatë verës dhe mbështetet nga disa sindikata dhe e majta radikale ka bërë thirrje për një mbyllje mbarëkombëtare duke filluar nga sot.
Siç është njoftuar, rreth 80,000 oficerë policie dhe xhandarmërie do të vendosen në të gjithë Francën, ku po organizohen dhjetëra protesta kundër politikave të Macron. Më shumë se 100,000 pjesëmarrës pritet të marrin pjesë në demonstrata, të cilat do të variojnë nga bllokime rrugësh deri te tubime proteste.
Autoriteti i Aviacionit Civil parashikon probleme dhe vonesa në të gjitha aeroportet franceze. Në rajonin Ile-de-France, vonesa priten në shumë linja treni, ndërsa një forcë e madhe policore është vendosur në stacionin Gare du Nord në Paris, pasi konsiderohet një objektiv i mundshëm për protestuesit.
Që nga mëngjesi i së mërkurës, përleshje midis protestuesve dhe policisë kanë ndodhur në disa zona të Parisit dhe qyteteve të tjera, ndërsa janë bërë mbi 100 arrestime.
Autoritetet në kryeqytetin francez u përleshën me nxënësit jashtë shkollës së mesme Hélène-Boucher . Koshat e plehrave u përmbysën dhe u hodhën drejt automjeteve të policisë, ndërsa të rinjtë që morën pjesë në protesta hodhën sende drejt oficerëve.
Gazi lotsjellës u përdor për të shpërndarë turmën e protestuesve, shumica e të cilëve kishin fytyrat e mbuluara. Sipas mediave franceze, incidente kanë ndodhur edhe në Lion, Marsejë dhe Bretanjë.
Kujtohet se dje, në prag të demonstratave dinamike në të gjithë vendin dhe një ditë pas rënies së qeverisë Bayrou, Emmanuel Macron emëroi ministrin e Mbrojtjes Sébastien Lecorni , bashkëpunëtorin e tij të besuar, që vinte nga krahu i djathtë, si kryeministër.
