Sikundër ishte paralajmëruar edhe më herët, nën masa të forta sigurie ka nisur seanca gjyqësore për vlerësimin e masës së sigurisë për arrestimin e të “fortëve” të fshatit Nikël.
Nga aksioni i pak ditëve më parë nga forcat RENEA, u arrestuan pesë persona, përkatësisht Lutfi Haka 67 vjeç, Marklen Haka 27 vjeç, Ylli Çangu, 42 vjeç, Skënder Leza, 34 vjeç, Valter Bami 32 vjeç.
Lidhur me këtë aksion, policia u shpreh se aksioni ishte finalizim i një pune hetimore disa mujore, mbi veprimtarinë e grupit të Niklës, me përgjime, gjurmim e mbledhje të dhënash në rrugë operative.
Gjatë kontrollit të banesave dhe ambienteve të tjera, policia gjeti dhe sekuestroi armë zjarri, municione, mjet të blinduar, euro, dollarë e lekë si dhe sende të tjera të poseduara në mënyrë të paligjshme.
Ndaj të arrestuarve është ngritur akuza “armbajtje pa leje” dhe “pastrim i produkteve të veprës penale”.
