Në Bundesligën gjermane duket se ekipi i lojtarit të kombëtares shqiptare, Hamburgu i Mërgim Mavraj është shumë pranë rënies për të parën herë në historinë e klubit. Sipas prestigjiozes “Bild” ka një fakt mjaft interesant për disa lojtarë që janë aktualisht pjesë e ekipit. Ata janë lojtarë të cilët të gjithë kanë provuar shijen e rënies nga kategoria dhe sipas “Bild” nuk e ndjejnë shumë fanellën.
Mavraj është ai që kryeson këtë kategori lojtarësh, pasi ka provuar tre herë shijen e të rënit nga kategoria. Mavraj ra nga kategoria në vitin 2010 me Bohumin, në vitin 2013 me Grojther Furthin, në vitin 2007 me Darmshtadin, kur ra nga kategoria e katërt në të pestën.
Ndër emrat e tjerë të ekspertëve të rënies nga kategoria janë edhe lojtarë të njohur si Ljuis Holtbi, Sven Shiplok dhe Filip Kostiç. Janë lojtarë që nuk e ndjejnë shumë fanellën e ekipit ku luajnë, por e kosndierojnë si një shtëpi me qera. Holtbi për shembull, ka rënë nga kategoria me Bohumin, ku ishte huazuar nga Shalke, por edhe me Fulhemin në Angli, ku u huazua nga Totenhemi.
Filip Kostiç ka rënë nga kategoria me Shtutgartin në sezonin 2015/16. Alin Ekdal ka rënë dy herë nga kategoria, në sezonin 2012/13 me Sienën dhe më pas me Kaljarin. Boiy Vud nuk arriti ta shpëtonte Aue të binte nga Bundesliga 2. Sezonin e kaluar ishte Shiplok që ra nga kategoria, pasi ishte në huazim te Darmshtadi. Thoelke ra me Karlsruhen në ligën e 3-të, ashtu si dhe Mohamed Gouaida.
