Kompanitë më të mëdha koncesionare realizuan në 2015-ën plot 435 milionë euro të ardhura bruto, sa 4.2% e prodhimit vjetor të ekonomisë. Kjo shifër është publikuar nga Qendra Kombëtare e Biznesit.
Por, cilat kanë qenë përfitimet e qytetarëve?
Sipas të dhënave, në vitin 2015, kompanitë koncesionare paguan në total 45 milionë euro taksa direkte. Megjithatë, pjesa më e madhe e kësaj shume erdhi nga renta minerare, e cila është një taksë e veçantë në masën 10%, që ngarkohet mbi prodhimin bruto të naftës.
Po të përjashtojmë rentën, rezulton se 15 koncesionet më të mëdha të vendit paguan, në vitin 2015, vetëm 8 milionë euro tatim mbi fitimin, që i bie më pak se 5% e taksave që qeveria u merr qytetarëve mbi rrogën, shkruan Top Channel, pasi bëri një hulumtim në bilancet e 15 koncesioneve në vend.
Në vitin 2015, kompanitë koncesionare deklaruan në total vetëm 14 milionë euro fitim neto, kjo pasi rreth 40% e tyre deklarohen me humbje.
Pra, koncesionet e reja në vitet e para rekuperojnë kostot që kanë bërë për nisjen e aktivitetit, por sa më shumë kalon koha, aq më shumë bilancet e tyre gjenerojnë fitime marramendëse, që variojnë nga 30-75%.
