Për vitin 2017, Policia e Shtetit ka ushtruar 14.858 kontrolle për kultivim të bimëve narkotike.
Prej statistikave të publikuara, gjatë një konference për shtyp, nga Drejtori i Sigurisë Publike, Altin Qato, ka rezultuar se deri tani, uniformat blu kanë bërë një punë me profesionalizëm për të përmbushur vizionin e Planit Kombëtar kundër kanabisit.
Sipas Qatos, për këtë vit, gjatë periudhës Janar – Prill 2017, janë evidentuar 16 vepra penale, janë identifikuar 21 persona si të përfshirë dhe 3.567 bimë të sekuestruara.
Si rezultat i masave të marra nga strukturat e Policisë së Shtetit është bërë e mundur, që gjatë kësaj periudhe, të goditen 493 raste prodhimi, shitjeje dhe trafik të lëndëve narkotike.
Janë arrestuar 379 autorë, si dhe janë referuar materialet në Prokurori për 243 autorë të tjerë.
Janë sekuestruar gjithsej rreth 28 tonë kanabis, 1 kg kokainë, 12 kg heroinë.
Ndërsa, ndryshe nga herët e tjera, gjatë kësaj periudhe janë hetuar nga Drejtoria e Standardeve Profesionale, 58 punonjës policie, nga të cilët, 13 punonjës policie janë përjashtuar nga Policia, 1 vërejtje me paralajmërim dhe 1 vërejtje, ndërsa të tjerët janë në proces hetimi penal dhe administrativ.
