Filipinet kanë nisur të bëjnë bilancin njerëzor, si pasojë e tajfunit “Mangkhut”. Mediat e huaja raportojnë për të paktën 25 viktima. Sipas Francis Tolentinos, një zëdhënës presidencial dhe koordinator për reagimin ndaj fatkeqësive, tha se viktimat kanë ardhur si pasojë e rrëshqitjes së dherave në rajonet Cordillera dhe Nueva Vizcaya.
Stuhia që u përplas në thuajse 900 km gjatësi, me reshje tejet të dendura dhe erëra të furishme, po drejtohet tashmë në rajonet jugore të Kinës. Një rrezik të konsiderueshëm përbën edhe për Hong Kongun, ku banorët janë paralajmëruar të ruajnë vigjilencën.
Në Filipine, tajfuni preku fillimisht tokën në Baggao, në verilindje të ishullit të Luzonit, të shtunën në orën 1:40 me lokalen, e u largua pas rreth 20 orësh. Edhe pse fillimisht u konsiderua si stuhia më e fuqishme për vitin 2018, “Mangkhut” humbi shumë nga forca e tij me të prekur tokën.
Plot 5 milionë njerëz ishin në trajektoren e tij, dhe mbi 100 mijë vetë gjetën strehim në disa qendra të përkohshme të sigurta.
