Teksa çmimi i naftës në vendin tonë qëndron konstant, në vendet tjera ka rënë në nivelin më të ulët të 5 muajve. Kjo ulje e çmimit të naftës ka rënë për shkak të frikës së mbi ofertës dhe perspektivës për një ekonomi globale të dobësuar.
Sot, nafta bruto tregtohej në nivelin 44.92 dollarë për fuçi, pra 60 cent më pak. Megjithatë, operatorët pohojnë se reagimi mund të jetë minimal në tregun vendas, për shkak të rivendosjes së tarifave të rilicencimit prej 3 milionë lekë për stacion karburanti e gazi në Tiranë dhe 1 milion lekë në rrethe.
Këto tarifa pritet të ndikojnë me 5-6 lekë për litër në çmimin e naftës dhe si rrjedhojë do të amortizojnë efektin e pritshëm në tregun e brendshëm.
Aktualisht, një litër naftë në tregun vendas luhatet mes 171-174 lekë për litër, duke u renditur ndër 35 më të shtrenjtat në botë, si pasojë e shtrenjtimit të dollarit dhe rritjes së barrës së taksave.
