Me ardhjen e vjeshtës, shirat kthehen në një kërcënim për shumë qytetarë, e sidomos në bujqësi.
Përmbytjet në vend kanë shkaktuar shpesh probleme për këtë sektor, e ndërsa shpërblimet nuk janë shpërndarë ende të gjitha.
Autoritetet apelojnë për sigurimin e tokës nga fatkeqësitë natyrore, një praktikë kjo që duhet thënë se është mjaft e neglizhuar në vendin tonë, pavarësisht rasteve të shpeshta të dëmtimit të prodhimeve bujqësore për shkak të motit jo të mirë.
Të dhënat më të fundit për tregun e sigurimeve nga Autoriteti i Mbikëqyrjes Financiare, flasin për një rënie me 3.83% të numrit të primeve në zërin sigurimi nga zjarri dhe forcat e natyrës në krahasim me të njëjtën periudhë të vitit 2016.
Numri i kontratave në këtë portofol ndërkohë ka rënë me 6.19%.
Tendenca në rënie e kësaj kategorie është përgjithësisht kundër tendencës së përgjithshme të tregut, gjë që nënvizon se në këtë drejtim duhen bërë përpjekje më të mëdha nga autoritetet përgjegjëse, për të ndërgjegjësuar fermerët, apo banorët në zonat e rrezikuara, që të sigurojnë pronën e tyre nga fatkeqësitë natyrore.
