Shkrimtarja Erenestina Gjergji Halili është nderuar sot me Pendën e Kristaltë, për vëllimin “Bibulz – Për ma t`parën lule t`kopshtit tem”.
Ky çmim iu dha shkrimtares dhe pedagoges nga Instituti për Mbrojtjen e Kulturës Shqiptare, për ruajtjen e kulturës gege dhe toskë dhe për magjinë e shkrimeve të saj.
Edhe shkrimtarja ka reaguar pas marrjes së këtij çmimi, teksa ka shkruar në Facebook:
“Drita sot paska çilë ndrysh! Me nderon ky çmim e vëmendja juej!
Ju falem nderës!”
Çmimi në fjalë për shkrimtaren vjen nga Vjena, nënshkruar nga Gjergj Jozef Kola dhe Hans-Joachim Lanksch.
Gjithë vëllimi i saj poetik është një intertekst, ajo e mbështet idenë e saj poetike, kumtin e fjalës dhe ligjërimin poetik, në paratekstin biblik.
Duket se është një udhë e heshtur vargjeve e ditëve kalendarike, ku shenjat mistike e biblike, shënjojnë shkallët që ngjit e zbret autorja, here në ferr e here në parajsë, duke risemantizuar kodet e lashta në ditët moderne, duke futur në qerthull lexuesin e saj, si të jetë aty, me të në travajë e gëzim, në lutje e meditim, në natyrë e në pikturë, në muzikë e vallëzim.
