Përplasja mes Federatës Gjermane të Futbollit dhe Mesut Ozil mesa duket do të ketë pasoja më të mëdha nga sa u mendua. Akuzat e mesfushorit për racizëm mund ti heqin mundësinë gjermanëve që të organizojnë “Euro 2024”, në të cilin janë në garë me Turqinë. Por Reinhard Grindel, presidenti i DFB shprehet se kjo nuk do të ketë asnjë ndikim në atë vendim.
Ozil u largua në mënyrë aspak paqësore nga kombëtarja, pasi Gjermani u eliminua në mënyrë të turpshme nga Botërori i Rusisë, ai kritikoi drejtuesit për racizëm dhe mosrespektim. Por përplasjet kishin misur më parë, që nga momenti ku Ozil dhe Gundogan u vunë nën shënjestër për një fotografi të bërë me presidentin turk, Rexhep Tajip Erdogan.
Gundogan ka thënë se ai dhe Ozil janë veçuar pas disfatës së Gjermanisë dhe se “linja e racizmit u kalua pjesërisht”. Ozil ishte gjithashtu kritik ndaj Grindel, duke thënë se, në sytë e presidentit, “jam gjerman kur fitojmë, jam emigrant kur humbim”. Grindel vazhdon t’i mohojë akuzat, ndërsa Gjermania përballet me konkurrencën e Turqisë për të pritur “Euro 2024”.
“Gjithkush në DFB dhe në UEFA më njeh shumë mirë, – tha Grindel për “Sky Sports”. – Mendoj se të tilla polemika nuk do të kenë asnjë ndikim në procesin e tenderimit përkatës për vendin organizator të Europianit të vitit 2024″.
Grindel shtoi se kritikat e tij mbi fotografinë buronin nga bindjet personale në vend të sfondit të Ozil: “Në fund nuk ka të bëjë fare me atë nëse një lojtar ynë ka sfond emigrimi apo jo. Nëse një lojtar gjerman, në një fushatë zgjedhore, do të bënte një fotografi me një politikan shumë të djathtë në Gjermani, do të kishim të njëjtin debat dhe ne në DFB do të reagonim në të njëjtën mënyrë.
Ne qëndrojmë në DFB për vlerat kryesore: respekt, tolerancë, lojë e drejtë, liria e fjalës dhe liria e shtypit. Kjo foto me Erdoganin i shqetëson tifozët tanë, sepse presidenti i tyre, Erdogan, nuk qëndron për këto vlera”. UEFA do ta njoftojë vendin organizator të “Euro 2024” në Nyon të Zvicrës, më 27 shtator.
