Besnik Hasi është pranë rikthimit në detyrë pas përfundimit të parakohshëm me polakët e Legias së Varshavës dhe grekëve të Olympiacos. Edhe pse ai u siguroi kualifikimin për në fazën e grupeve të Ligës së Kampionëve. Klubi i Genk në Belgjikë ka shkarkuar pak dit më parë nga stoli trajnerin Albert Stuivenberg dhe mendohet që ish-kapiteni i Kombëtares shqiptare të marrë drejtimin.
Me ekipin që renditet në vendin e nëntë në kampionat, drejtuesit e klubit vendosën ta shkarkonin holandezin për mosrealizimin e objektivit. Besnik Hasi cilësohet si shpëtimtari i sezonit, edhe sepse 46-vjeçari e njeh mjaft mirë ambientin. Gjatë karrierës si futbollist, gjakovari ka luajtur 5 sezone me ngjyrat e Genk, në dy etapa të ndryshme, madje në vitin 1999 fitoi edhe titullin e parë kampion në Belgjikë si lojtar.
Rikthimi si trajner në Jupiler Pro League cilësohet si lëvizja ideale për Hasin, pasi njohuria e madhe që ka për kampionatin do ta ndihmonte të ringrinte kuotat si trajner, ndërsa ish-kapiteni kuqezi është përfolur edhe si alternativë për stolin e përfaqësueses së Kosovës.
