Ish-kryeministri Sali Berisha ka folur me superlative për kryedemokratin Basha. Teksa ishte i ftuar në emisionin “Debati në Channel One”, Berisha foli për meritën historike të Bashës, që sipas tij ishte Rruga e Kombit.
Deputeti ka treguar se ka urdhëruar Bashën për ndërtimin e saj me çdo kusht, ndërsa sipas tij, merita e liderit të opozitës është fakti që bindi përfaqësuesit e Fondit Monetar.
“Kur e kam caktuar ministër të Punëve Publike e thirra dhe më pyeti: Përse unë këtu? Për këtë rrugën. Kjo është gjithçka, i thashë. Ne do ta ndërtojmë këtë rrugën me çdo kusht. Kur i shkoi Orsalia në zyrë dhe i tha çfarë e ke këtë hartë, Basha iu përgjigj (E mbante hartën edhe në tavolinë dhe në mur): E kam këtë hartë për të më kujtuar misionin tim kryesor, ndërtimin e rrugës. Lulzim Basha ka dhënë një kontribut shumë të madh në atë vepër. Ka patur kundërshti të mëdha. Unë isha i vendosur edhe sikur të ikte Banka Botërore, unë do ta ndërtoja rrugën. Por Lulzim Basha bindi përfaqësuesit e Fondit Monetar. Kjo është meritë e madhe e tij, edhe për shumë të tjera, por kjo është më e madhja. Basha nuk u dorëzua ndaj asnjë presioni për tu tërhequr nga ndërtimi i rrugës. Dhe së treti e ndoqi bashkë me financat procesin. Basha ka një meritë historike të padiskutueshme sepse e zbatoi një projekt që është sot korridori më vizibël i Ballkanit.”
Po ashtu, Berisha theksoi se Basha nuk e imiton atë, pasi ka krijuar konturin e vet të opozitarizmit:
“Në lidershipin e PD ndodhi ndryshim gjeneracional. Basha është gjenerata juaj. Nuk është gjeneratë e imja. Basha përfaqëson gjeneratën e tij. Mund ta akuzosh Bashën për shumë gjëra por nuk mund ta akuzosh se po imiton Sali Berishën. Çka unë e përgëzoj. Sepse ai nuk duhet të më imitojë mua. Ai ka krijuar konturin e vetë të opozitarizmit. Nuk ka humbje të përhershme dhe nuk ka fitore të përhershme në politikë.”
Kujtojmë se mazhoranca e ka akuzuar ish-ministrin Basha se ka abuzuar me fondet gjatë ndërtimit të Rrugës së Kombit.
