Ish-kryeministri, Sali Berisha ka folur sot në “Çadrën e Lirisë”, në ditën e 56 të protestës.
Berisha i bëri thirrje Ramës që të mos guxonte t’i përçante shqiptarët, përndryshe atij do t’i dukej lumi Lana si vaskë floriri:
“Ti harron se ky është një hap përçarës i turpshëm. Ti harron se ata janë më njerëz se ti. Ata i thonë Shqipërisë, Shqipëri, dhe e duan këtë vend më shumë se ti. Ata i thonë dinjitetit njerëzor, dinjitet, dhe janë të gatshëm në çdo kohë që Lana të të duket vaskë floriri dhe të marrësh atë që meriton. Në këtë çadër shkruhet “guxo po deshe”, por ti nuk guxon dot dhe sillesh si një skuth duke sharë se të ka humbur mendja. Guxo po deshe!”
Gjithashtu, Berisha u foli protestuesve në çadër, teksa u tha të mos kishin iluzione, sepse Rama nuk e jep dorëheqjen, por janë ata që duhet ta shporrin kryeministrin:
“Edi Rama nuk e jep dorëheqjen, duhet ta shporrim ne. Do bëjmë çdo sakrificë, derisa qëllimi të bëhet realitet. Rama u tha njerëzve të tij para dy javësh se ‘ne jemi para alternativës ‘pushteti ose burgu’. Ose e mbajmë pushtetin me çdo kusht, ose na pret burgu.’ Ai meriton më shumë se burgu. Para një jave Rama kaloi ligjin për të amnistuar politikanët për të gjitha veprat penale që kanë kryer, për të amnistuar ministrat e tij. Pra mos të kemi iluzione se Ramën nuk e lejojnë të japë dorëheqjen. Edi Rama ka vetëm një vend, burgun, burgun dhe vetëm burgun”.
