Kryetari i Partisë Demokratike, Sali Berisha, premtoi sot se në programin e tij për qeverisjen 2025-2029 do të bëhen ndryshime të thella në vlerësimin dhe kompensimin e pronave, duke siguruar që ato të jenë në përputhje me tregun dhe vetëm me tregun. Por, gjatë takimit ku prezantoi këtë program, një i moshuar, i cili u prezantua si kryetar i shoqatës së pronarëve në Vlorë, i bëri një kritikë të ashpër Berishës dhe PD-së për trajtimin e ish-pronarëve.
Ai e akuzoi PD-në dhe Sali Berishën për mashtrim të ish-pronarëve gjatë periudhës së 12 viteve të qeverisjes së tij, duke theksuar se asgjë nuk ishte realizuar për ndryshimin e ligjit 7501, i cili, sipas tij, është anti-kombëtar dhe tradhtar. “Ne nuk jemi ish pronarë, ne jemi pronarë,” tha ai, duke kritikuar qeverisjen e PD-së për atë që e quajti një tradhti ndaj pronarëve dhe pasurisë së tyre.
I moshuari e akuzoi Berishën dhe PD-në për politikë të dyfishtë, duke thënë se çdo herë që merrnin pushtetin, ata harronin angazhimet ndaj pronarëve dhe kërkesat e tyre të drejta. Ai e quajti këtë një tradhti të madhe dhe kërkoi ndryshime të vërteta, duke kërkuar një angazhim të thellë dhe të sinqertë për zgjidhjen e çështjes së pronave në Shqipëri.
“Ne nuk do të jemi karrocë e qeverive. Ju doni shoë, të thoni bëmë me ish pronarët takim dhe ramë dakort. Na nisni programin, ta shohim edhe të mbajmë edhe ne qëndrimin tonë. Jo kështu. Ne kemi kaq shumë vërejtje, se me pronat, PD, se unë jam vetë i PD, sa herë ka nevojë na thërret, kur merr pushtetin na harron. Se ke qenë 12 vjet në pushtet. Është realizuar gjë nga ajo që unë kam kërkuar të ndryshohet në ligjin 7501? Ne kemi bërë debat, për një fjalë në ligjin, për atë kemi bërë grevë, ndryshoje tani.
Edhe të gjithë quhen ish pronarë, ne jemi pronarë zotëri, jo ish pronarë, sepse ligji 7501 është anti-kombëtar. (është tradhtar mbi të gjitha dëgjohet një zë) Ta mbaroj zoti Berisha, se edhe unë jam mosha juaj dhe kam 34 vite që po duroj, e nga inati nuk po vdes. Kur do bëhet? Kur të merret pushteti e të harroni? Sic u harrua 92-96, apo 2005-2013, sic do harrohet po u mor pushteti? Jo jo, duhet kapur nga themeli. Është tradhtia më e madhe termi ‘pronësi’ jo ‘përdorim’ tha ai.
