Kryetari i Partisë Demokratike, Sali Berisha, ka marrë një ftesë zyrtare për të marrë pjesë dhe për të mbajtur një fjalim në Kongresin e Partisë Popullore Evropiane (PPE) 2025, që do të mbahet më 29-30 prill në Valencia, Spanjë.
Ftesa është firmosur nga Manfred Weber, presidenti i PPE-së, dhe Alberto Núñez Feijóo, kreu i Partisë Popullore të Spanjës. Në këtë event do të diskutohet për drejtimin e ardhshëm të PPE-së dhe të Bashkimit Evropian, si dhe do të zhvillohen zgjedhjet për presidencën e re të partisë dhe votime për ndryshime statutore.
Më 29 prill, Berisha është gjithashtu i ftuar në Darkën e Liderëve, ku do të marrin pjesë kryeministra, zëvendëskryeministra dhe liderë të opozitës nga vendet anëtare dhe jo-anëtare të BE-së.
