Një aksident ka ndodhur mëngjesin e sotëm, në fshatin Vërzhezhë të Beratit. Drejtuesi i një mikrobusi me nxënës ka humbur kontrollin dhe është përplasur. Dyshohet se automjeti ka rrëshqitur dhe ka dalë nga rruga, duke shkaktuar disa persona të plagosur. Raportohet se në mikrobus udhëtonin 15 nxënës, të moshave 14-18 vjeç, të cilët ishin nisur në shkollën e Çorovodës.
Mësohet se 8 nxënës janë dërguar në spitalin e Beratit dhe dy të tjerë ndodhen në gjendje kritike, ndërsa pritet të transportohen në spitalin e Traumës në Tiranë me helikopter. Ende nuk ka detaje të tjera nga policia.
Njoftimi i policisë
Në orën 07:35, mjeti me targa AA 445 KE me drejtues shtetasin A.H, që transportonte nxënës shkolle nga fshatrat Buzuq dhe Orizaj për në shkollën e Çorovodës, ka dalë nga rruga. Për pasojë nxënësit E.K, 17 vjeçe , A.K, 17 vjeçe, R.H, 17 vjeç dhe B.H, 17 vjeç po dërgohen në Spitalin Rajonal Berat për të marrë ndihmë mjekësore, ndërsa nxënësja R.K, 18 vjeçe, po transportohet në Spitalin e Traumës në Tiranë për ndihmë më të specializuar. Janë lënduar lehtë edhe 5 nxënës të tjerë të cilët ndodhen në Spitalin e Skraparit, për të marrë ndihmë mjekësore pa probleme për jetën.
