Mbrojtësi kroat, Domagoj Vida nuk di të ndalet, pas thirrjes “Lavdi Ukrainës” është publikuar një video tjetër ku shprehet “Beogradi të digjet”. Nuk kanë kaluar as 24 orë nga paralajmërimi i bërë nga FIFA dhe shpërthen skandali tjetër. Dhe nuk dihet se çfarë vendimi do të merret për lojtarin, pasi Kroacia të mërkurën në mbrëmje duhet të zbresë në fushë për tu përballur me Anglinë në gjysmëfinalen e Botërorit.
Një video e dytë që ka detyruar FIFA-n të rinisë procedurën e hetimit ndaj futbollistit kroat. Edhe në këtë filmim, shënuesi i golit të dytë për Kroacinë në ndeshjen ndaj Rusisë, shfaqet me një birrë në dorë, kësaj here i shoqëruar nga një tjetër trajner i stafit kroat, ish-futbollistin Ivica Olic.
Ivica Olic, është i ulur pranë tij dhe lëshon një puthje në drejtim të kamerës. “Le të shkojmë në bar, paguaj unë kur të mbërrij. Lavdi Ukrainës, Beogradi të digjet, jepi”, thotë Vida. Mbrojtësi i Besiktas ka luajtur në të kaluarën për Dynamo Kiev, në Ukrainë, njëlloj sikurse dhe Vukojevic. Frazat e përdorura në videon e parë të publikuar nga Vida lidhen me politikat anti-Ruse në Ukrainë.
