Beogradi zyrtar ka reaguar pas deklaratës së shqiptarëve të Luginës së Preshevës me kërkesat për të zgjidhur statusin e vet politik në reciprocitet me serbët në veriun e Kosovës të miratuar sot.
Kryetari i Trupit Koordinues i Qeverisë së Serbisë për komunat Preshevë, Bujanoc e Medvegjë, Zoran Stankoviç thotë se shqiptarët nga jugu i Serbisë nuk janë temë e bisedave në Bruksel.
Deklaratën e shqiptarëve, Stankoviç e ka quajtur politike për shkak të, siç tha, zgjedhjeve paraprake për Këshillin Kombëtar Shqiptar.
“Bashkësia ndërkombëtare qartë dhe zëshëm ka thënë se komunat Preshevë, Bujanoc dhe Medvegjë në asnjë moment nuk janë temë e Brukselit. Prandaj, nuk shoh atë reciprocitet”, citon gazeta e Beogradit “blic” të ketë thënë Stankoviç.
Kjo deklaratë, theksoni ai, është vazhdim i nxjerrjes së deklaratave të tyre.
“Në Deklaratë ka gjëra që do t’i analizojmë, por ka edhe shumë gjëra të papranueshme”.
“Nuk e di çfarë kanë serbët në Kosovë, pasi që shumë gjëra nuk janë rregulluar, por shqiptarët që jetojnë në territorin e Preshevës, Bujanocit e Medvegjës kanë të gjitha të drejtat të parapara me Kushtetutën dhe me ligjet e këtij vendi si dhe me konventat që rregullojnë të drejtat e minoriteteve kombëtare në Serbi”, ka përfunduar Stankoviç.
