Benevento “spiunon” Panuccin, ja kë la italiani jashtë kombëtares

Akoma pa u bërë publike lista e lojtarëve të grumbulluar në Kombëtare për miqësoren me Norvegjinë në “Elbasan Arena” më 26 Mars. Është konfirmuar që Ledian Memushaj nuk do të jetë pjesë e kësaj liste. Lajmi është bërë i ditur nga faqja zyrtare e Beneventos, ekip ku luan vlonjati. Me anë të një postimi Benevento ka konfirmuar dy lojtarët që janë ftuar në ndeshjet miqësore të fundit të marsit dhe përmenden dy emra, Beraj Gjimshiti dhe rumuni, Alin Dorinel Tosca. Duke mos përmendur emrin e Memushajt, çka konfirmon mungesën e një ftese nga Christian Panucci në drejtim të mesfushorit 31-vjeçar.

Memushaj nuk figuron i dëmtuar, pasi nga mediat italiane jepet në formacionin e mundshëm të Beneventos për sfidën e 18 marsit me Cagliarin, por një arsye që mund të ketë ndikuar në vendimin e trajnerit të Kombëtares, mund të jetë aktivizimi i paktë i Memushajt te Benevento, ku ka humbur statusin e titullarit nga trajneri De Zerbi.

Memushaj u la në stol pa u aktivizuar për asnjë minutë në takimin e fundit me Fiorentinën, ndërkohë që nuk aktivizohet me skuadrën italiane që nga ndeshja e 4 shkurtit të kaluar me Napolin. Për sa i përket Berat Gjimshitit, titullar fiks te Benevento, klubi italian bën të ditur se do të bashkohet me Kombëtaren Shqiptare mëngjesin e së hënës, për t’u vënë ën dispozicion të Panuccit për miqësoren e 26 Marsit.