Lojtarët e skuadrës kombëtare të Zvicrës Granit Xhaka dhe Xherdan Shaqiri ishin dy heronjtë e helvetëve në fitoren e ndeshjes ndaj Serbisë.
Si për t’i dhënë një domethënie edhe më të madhe ndaj kundërshtarit që kishin përballë, të dy lojtarët me origjinë shqiptare festuan duke kryqëzuar duart në formën e simbolit kombëtar shqiptar. Një gjest që tashmë është bërë shumë i njohur që nga bota e filmit, muzika, e deri tek futbolli natyrisht.
LEXO EDHE: Shqiponjat “pushtojnë” Rusinë, Xhaka dhe Shaqiri përmbysin Serbinë (Video)
Por, ata që nuk e kapërdijnë dot, janë serbët si gjithmonë. Aq sa pas ndeshjes mediat serbe dhanë alarmin se Xhaka dhe Shaqirin bënë simbolin e flamurit kombëtar shqiptar. Dhe për këtë arsye, sipas medias serbe FIFA duhet t’i dënojë të dy lojtarët që hodhën nokaut Serbinë, e cila tashmë ka shumë pak shanse për të kaluar grupin e këtij botërori, shkruan Tirana Today.
LEXO EDHE: Lajthitin mediat serbe: FIFA, dënoje Xhakën dhe Shaqirin (Video)
Me sa duket serbëve vazhdon t’u qëndrojë ende në kokë droni i hedhur në stadiumin e Partizanit të Beogradit në tetorin e vitit 2014, në ndeshjen me Shqipërinë, e cila më shumë se sa futboll u shndërrua në një arenë grushtesh dhe shkelmash, ndërsa tifozët serbë lëshonin kore raciste nga shkallët e stadiumit.
Për këtë arsye, janë provokuar edhe nga gjesti i dy lojtarëve me origjinë shqiptare. Gjesti u kap nga shumë media botërore. Midis tyre edhe ajo angleze. Ndërsa “The Indipendent” shkon më tej duke i fryrë histerisë serbe. Ajo shkruan se Xhaka dhe Shaqiri mund të dënohen nga FIFA për gjestin e tyre në ndeshjen ndaj Serbisë, me argumentin se nuk mund të ngatërrohet futbolli me politikën.
“Granit Xhaka dhe Xherdan Shaqiri mund të përballen me dënime ose sanksione për përdorimin e simbolit nacionalist shqiptar, gjatë festimit të golit në fitoren dramatike të Zvicrës 2-1 ndaj Serbisë, mbrëmjen e së premtes për Kupën e Botës, Rusi 2018” , shkruan The Indipendent.
Granit Xhaka
Granit Xhaka, i ati i të cilit (Ragip Xhaka) ka qenë i burgosur nga regjimi i Ish-Jugosllavisë pas protestave për pavarësinë e Kosovës, festoi golin e barazimit me duart e tij të hapura dhe duke “rrahur” gishtat e tij. Gjesti është referencë për – shqiponjën dykrenore të flamurit kombëtar shqiptar.
Shaqiri
Shaqiri, i cili ka lindur në Kosovë, mban në këpucën e tij flamurin Kosovës dhe atë të Shqipërisë, festoi në të njëjtën mënyrë kur shënoi golin e përmbysjes dramatike. Por, sipas medias angleze, festimet rrezikojnë të ndezin tensionet mes shqiptarëve etnikë dhe serbëve nacionalistë në Kosovë dhe më gjerë.
Institucionet politike të Kosovës me shumicë shqiptare shpallën pavarësinë nga Serbia në vitin 2008. Ndërsa Serbia ende nuk e ka njohur pavarësinë e Kosovës edhe pse ka kaluar një dekadë.
“Xhaka dhe Shaqiri mund të përballen me dënime nga FIFA, si organi qeverisës i futbollit botëror, nëse festimet e tyre do të konsiderohen shfaqje të simboleve politike”, shkruan tekstualisht media angleze.
Shaqiri reagoi me një emocion të veçantë pas shënimit të golit. “Unë mendoj se në futboll ka gjithnjë emocione. Ju e patë se çfarë bëra unë! Dhe ajo që bëra ishte vetëm pjesë e emocionit që të jep futbolli. Jam shumë i lumtur për rezultatin e ndeshjes. Ndërsa për pjesën tjetër nuk është koha që të flasim për të”, u shpreh Shaqiri.
Petkoviç
Nga ana e tij, trajneri i Zvicrës, Vladimir Petkoviç shpreson se skuadra e tij nuk do të penalizohet nga FIFA për shkak të simboleve me të cilat festuan Xhaka dhe Shaqiri.
“Nuk duhet ta përzieni politikën me futbollin. Emocionet shfaqen edhe në këtë mënyrë. Janë gjëra që ndodhin. Mendoj se të gjithë së bashku duhet ta mbajnë larg politikën nga futbolli dhe të përqendrohemi tek ky sport, si një lojë e bukur dhe që i bashkon njerëzit”, përfundoi Petkoviç.
TIRANA TODAY
