Ben Blushi ka folur sot në Parlament mbi kërkesën e PS dhe LSI për shtyrjen e regjistrimit të partive dhe koalicioneve në KQZ për zgjedhjet e 18 qershorit.
Sipas Blushit, dy partitë bashkëqeverisëse po çojnë vendin në zgjedhje të parakohshme, duke djegur me shpejtësi pesë raundet e zgjedhjes së Presidentit.
“Do shkoni në zgjedhje të parakohshme duke mos zgjedhur Presidentin? Do kapni afatet? Kjo është fatale. Doni ta zgjidhni Presidentin pas zgjedhjeve? Mundet. Doni të shtyni 18 qershorin me zgjedhje të parakohshme. Këtë e keni në dorë. Do shkoni në koalicion prapë? Jeni të bindur që me zgjedhje të parakohshme ata që janë në çadër do vijnë? Nuk besoj. Ua kam shpjeguar çfarë ndodh nëse në 18 Qershor disa parti nuk marrin pjesë. PS merr 120 mandate. PD duhet të kthehet dhe të marrë pjesë në zgjedhje me çdo kusht. Siç do marrë pjesë në zgjedhje LIBRA. Po shkelni afatet, po prishni 18 Qershorin me koshiencë. Ky vakum nuk është dinjitoz. Duhet të ketë dinjitet republika jonë. Jepni një kandidat, që ta njohë vendi. Nuk mund të dalë Presidenti natën e fundit. Çfarë do bëni nëse kjo zgjat pas 18 qershorit? E kam krahasuar 1997 me 2017, s’do doja kurrë të ndodhte. Në 1997 populli doli në rrugë për t’u mbrojtur. Sot e dinë shumë mirë se çfarë mund t’ju vijë prej nesh. Do rrinë në shtëpi, do mbrojnë pronën e vet”, tha Blushi ndër të tjera.
Pas fjalës së këtij të fundit, ka reaguar shkurt edhe kreu i Kuvendit, Ilir Meta, i cili u shpreh se kërkesa për shtyrjen e regjistrimit të partive në KQZ ka të bëjë thjesht me dëshirën dhe vullnetin për të evituar një krizë më të madhe, duke i dhënë mundësi opozitës që të përfshihet në zgjedhje.
