Drejtuesi politik i PD për Tiranën, Belind Këlliçi, i ftuar në emisionin “Të Paekspozuarit” në MCN TV, foli për hetimet e SPAK për inceneratorin e Tiranës.
Këlliçi tha se SPAK faktoi zhdukjen e 100 mln eurove, por nuk e ka fare idenë se ku kanë vajtur këto para, madje edhe kur ai ka depozituar prova për disa nga asetet që lidhen me këto para, SPAK i ka injoruar.
“Janë arritur deri tani të faktohet nga Prokuroria e Posaçme, që janë paguar deri në 2022, 120 mln euro për landfillin e Sharrës me letrat e kompanisë. Vlera e investimit shkon në 23 milionë euro. Pra SPAK thotë se kemi faktuar se janë zhdukur 100 mln euro. E thotë vendimi. Dhe nuk ka asnjë të dhënë se ku kanë shkuar këto 100 mln euro. Unë kam çuar në SPAK dokumenta, kontrata kleringu, kam çuar adresat e apartamenteve që i janë dhënë inceneratorit, që as përmenden dhe as merren parasysh. Unë kam gjetur nga këto 100 mln, të paktën 2.4 mln. Në këtë vendim thuhet se nga data 21 mars 2023, në kulmin e hetimeve dhe në fushatë elektorale të zgjedhjeve lokale, deri në 21 qershor 2023, shtetasi Elton Bualli, administrator në landfill, ka marrë kesh, në një exchange përballë Big Bite të Ambasada Amerikane, 500 mijë euro dhe i ka dorëzuar për llogari të Mirel Mërtirin, pra shkonin për të paguar mediat e vendit.
Këto vinin nga biznesi i dherave, që vijon të operojë edhe sot që ne flasim. A paguhen lekët për depozitimin e dherave apo jo? A shkojnë miliona euro kesh me çantë te landfilli i Sharrës? Të gjithë koston e hanë qytetarët”, tha ndër të tjera Këlliçi.
