Radja Nainggolan ka marrë goditjen e dytë radhazi nga kombëtarja e tij, Belgjika. Ai nuk është grumbulluar për në Botërorin e Rusi 2018 nga trajneri Roberto Martinez edhe pse konsiderohet si një ndër mesfushorët më të mirë në botë. Kjo situatë ka sjellë një debat të madh në Belgjikë, por edhe një zhgënjim të madh për lojtarin e Romës i cili ka deklaruar edhe tërheqjen nga kombëtarja pas kësaj situate. Vetë Nainggolan shprehet se ndihet shumë keq dhe se ai para të gjithëve tregon veten ashtu se si është, e nuk vë kurrë maskë.
“Unë kështu jam, nuk vë maskë, nuk mund të bëj dot gjë. Jam i lodhur duke u paraqitur gjithnjë si ai djali i keq. Futbolli ende ngelet një hobi për mua. Në rregull, tani është edhe punë, por unë dua të gjykohem për atë çfarë bëj në fushë dhe jo për atë që bëj jashtë fushe.
Mos duhet që të flasim ndryshe për Maradonna-n pastaj me këtë logjikë? Çdokush është i lirë të bëjë ç’të dojë nëse luan mirë. A mendoni se të gjithë futbollistët janë djem të mbarë? Mua për vete nuk më vjen turp. U ngopa me këtë çështje. Nuk dua të luftoj më. Të shkoja në botëror ishte ëndrra ime që fëmijë dhe tani mu hoq. Tani për tani jam në Guiness si futbollisti që për dy herë me radhë nuk iu lejua të merrte pjesë në një botëror. Është diçka kaq e pakuptueshme saqë më vjen për të qeshur…”, u shpreh Nainggolan.
Nainggolan tregoi se trajneri i kombëtares Martinez erdhi dhe e takoi në Romë, por ai në disa raste nuk e kuptoi se çfarë donte të thoshte dhe logjikën e mos grumbullimit.
