Teatri Profesionist i Prizrenit do të marrë emrin e ikonës kinematografike botërore, Bekim Fehmiut.
Kryetari i Kuvendit Komunal të Prizrenit, Kujtim Gashi, ka bërë të ditur se në mbledhjen e radhës së Kuvendit, do të merret vendimi për ta emëruar Teatrin Profesionist të Prizrenit, me emrin e Bekim Fehmiut.
“Kuvendi i Komunës së Prizrenit, në mbledhjen e radhës, do të marrë vendim për të emërtuar Teatrin Profesionist të Prizrenit, me emrin e njërit prej artistëve më të njohur të kinematografisë botërore, Bekim Fehmiu, i cili, karrierën e tij e filloi pikërisht në Teatrin e Prizrenit, për të lënë gjurmë të pashlyera në teatrin dhe kinematografinë kombëtare e ndërkombëtare. Ky propozim erdhi pas diskutimeve dhe koordinimit me administratën e Teatrit Profesionist të Prizrenit”, shkruan kryekomunari i Prizrenit.
Pak ditë më parë Bekim Fehmiu u kujtua në 7-vjetorin e vdekjes së tij.
