Ministri i Mbrojtjes së Serbisë, Aleksandar Vulin, ka reaguar me një deklaratë mjaft të ashpër duke u shprehur se vendi i tij duhet të ndalojë krijimin e “Shqipërisë së Madhe” (projekti nacionalist shqiptar i ekspansionit), dhe kjo gjë duhet të fillojë në Kosovë.
Duke folur në një tryezë të rrumbullakët kushtuar “dialogut të brendshëm të Kosovës me Serbinë”, Vulin tha se vendi i tij nuk duhet të lejojë “Shqipërinë e Madhe” të krijohet në kufijtë e saj dhe t’i lejojë të tjerët të tërheqin kufijtë.
Sipas Beta, Vulin gjithashtu tha se “duhet pranuar se nuk kërkohet një zgjidhje dhe negociatat nuk po zhvillohen me Prishtinën, por me Tiranën”.
Vulin e cilësoi “faktor shqiptar” në Ballkan si “jo të rastësishëm” dhe gjithashtu u shpreh se ai: “shikohet i bashkuar, i nënshtruar dhe me ide dhe udhëzime shumë të qarta dhe nuk mund të imagjinohet që përfaqësuesit e komunitetit shqiptar do të veprojnë në mënyra të ndryshme, pavarësisht se ku jetojnë në Ballkan”. TIRANA TODAY
