Për vijimin e dialogut me Serbinë, BE është duke ushtruar presion ndaj qeverisë “Haradinaj” për heqjen e taksës 100% ndaj mallrave serbe. Zëdhënësja e Bashkimit Evropian, Maja Kocijançiç, ka thënë për “Zërin” se qëndrimi i BE-së sa i takon taksës nuk ka ndryshuar.
Sipas saj, BE-ja pret që Serbia e Kosova të angazhohen në procesin e dialogut, në mënyrë që të shkohet drejt normalizimit të plotë të marrëdhënieve midis dy vendeve.
Nga ana tjetër, procesi i bisedimeve me Serbinë vijon të jetë i pezulluar, pasi Serbia tashmë ka bërë të ditur se nuk do të marrë pjesë në dialog deri në heqjen e tarifës.
